Nanavu Ritangga Ngana Birobuli Namate Ri Tampa

REPORTER: FIRMANSYAH

Ngata Palu,- NAASI Ranga dale i Bayu Kurniawan (26 thn) nompakana ante salarana hau mangelo doi, kaupuna nanjili ante sampesuvuna domo nonyawa. Kajadiana ri Salasa padondona (2/8/2017) ri dala Setia Budi  sabana nanavu dako ri bavo nutangga  tempona nobongkara rangka aluminium riara kantoro CV Erison Jaya.

Dala nutesana riwatuna tomate ante randua ito roana Syafrudin (26 thn) ante Rais (30 thn) samantara nokarja nobongkara rangka aluminium riara sala sangu ruanga ri kantoro hai. i tomate ante Safrudin nekase ri bavona nompake tangga, i safrudin mpatauraka gypsum ante rangka baja ka Bayu. 

I Safrudin nompetevaka ka tomate ala moosu ruru baut nentaka ri rangka baja samntara nikenisina. Ledo nisani saba tangga nipeuntuna nogoya mboto, kaupuna Bayu nanavu ante balenggana ruru norunju lante. Naupu hai ia nembangu nonturo ante natorompate. Nanggita kajadia hai, roana nakava nebantu nompainuka uve ka ia. Dopa nasae naupu nanginu uve hai, ia nanggor ante nangote nyawa. Naupu hai nipopaturu i Safrudin ante nomparesa uva nyawana, tano namate ri tampa.

Kasat Reskrim Polresta Palu AKP.Willian Harbensyah.SIK nipekutanaka masala hie nangulika, nakana naria tona namate nanavu dako ri bavo nutangga ngana ri dala Angkasa Btn.Mutiara Birobuli. nikenimo sampe suvuna ri banuamo. ** 

Share on Google Plus

Titik Eceran Koran Harian Kaili Post Di Kota Palu

Titik Eceran Koran Harian Kaili Post Di Kota Palu
loading...
close
 LAYANAN PEMASANGAN IKLAN