Hidayat : Teroris Nemo Mocoba Makava ri Palu

Foto : Ilustrasi 

RIARA PETEVAIKANA Ka kajadia tope bom ri tatalu gareja  ri ngata Surabaya eo Minggu padondona. Wali Kota Palu Hidayat nangulika mpu-mpu ledo nopokona ka urusa hai. ‘’Yaku no wakeleka todea ri ngata Palu notevaika mpu-mpu ledo nasituju ante inggu vesia hai. Kutevaika muni ka geira tope bom, nemo racoba-coba miu mompaka kaco ra ngata Palu,’’ pangulina. Anu hai niulina ka wartawan ri tempo nasoro notuntumaka haja nompaka roso bo deklarasi Forum Komunikasi Pomuda Kaili, Minggu (13/5/2018). Ri lapanga Vatu Lemo.

‘’Riara deklarasi hai, pura-purana todea ri Sulteng. Utamana ri ngata Palu notevaikamo mangeva urusa nompaka posampesuvuta ante agama ntanina. Pangane,  i Ustad Solmed bo torata nakava, nerapikamo doa ka kajadia ri Mako Brimob ante bom gareja ri Surabaya,’’ niulina.

Riara koterangana, i Wali Kota naase rarana nanggita bom nepogu ri ngata Surabaya. Ri tempona hie, ngata Palu danabelo posi sampesuvuna ante agama ntanina. Sakuya program ngata Palu, eva nombangu ante budaya noada, nopandasika iman bo taqwa. Anu hai muni pangulina sala sangu dako ri totua nggaulu ri Indonesia. Sangganipa nitevaikana, mangeva pura-pura nuapa nompaka botu posampesuvu ante to agama santanina naria ri ngata Palu.

Nipekutanaka nuapa karja dako Forum Komunikasi Pomuda Kaili, i Hidayat nangulika urusara natantumo nojagai posampe suvu riara ngata Palu hie. Anu hai muni najadi sala sangu sipa dako tho Kaili. " Eva kajadia popatesi ri Myanmar naliu. FKPK naria riantara todea, nompaka ama ri tempona geira manggavia demo makaco ri ngata Palu. Norambanga ante aparat kaamana, geira nojagai posampe suvu bo posimporoa ri Palu hie. Niepata puramo pangane, ri tempona deklarasi nabaca. FKPK bo garda bangsa noancamo ala nemo racoba-coba nompaka kacao ngata, ante nompaka botu posampe suvu ka geira dako ri sangata bo agama santanina,’’ pangakuna. Haja hai muni nikakavaka i ustad Solmed, Kapolres Palu AKBP Mujiyanto, anggota DPR RI Abdul Kadir Karim, wakele dako DPRD Palu, Sekot Palu Asri, Forkompimda ante torata nakava ntanina.**


Share on Google Plus

0 komentar:

Post a Comment

Titik Eceran Koran Harian Kaili Post Di Kota Palu

Titik Eceran Koran Harian Kaili Post Di Kota Palu
close
 LAYANAN PEMASANGAN IKLAN