WAKELE TODEA BONTANG NANJAYO RI PALU

'

Reporter: Firmansyah

DEANA Alima wakele todea DPRD Bontang, Provinsi Kaltim. Nakava nanjayo ri kantoro Dekot Palu, Kamisi (6/12/2018). Gunana kakavara hai ala manggisani, berimba cara mpaolah uve nagali riara ngata Palu. Kapala rombonga, kotua Komisi II, Ubaya Bengawan nipekutana nasoro posintomu nangulika, batua kakavara ri DPRD Palu, mompolajari urusa dasar. Eva berimba cara motangani uve gali.

Santanina muni niuli i Ubaya, mompaka roso posampesuvu geira ante wakele todea Palu. " Tujuna kami nakava ri si hie, mompaka belo posiporoa ante wakele todea Palu. Alu maroso posampesuvuta ante geira, "pangulina.

Rancanana panguli i Ubaya, DPRD Bontang mboto modekei bantua ka todea naupu nambela lingu. Tapi podekeina ledo radekei morambanga. Aga saito-saito ngena manggavana. Nipekutanaka sakuya kira-kira deana bantua hai, ia ledo nadota nangulikana.

Nitambaina, pamarenta ngata Bontang, naupumo nodekei doi dako ri APBD, deana 250 Juta ka pamarenta Palu. Nidekei mboto Wali kotara. Nitambai muni podekei dako ante todea ri ngatara, ri tempona lingi, Tsunami bo tana noenju. " Jadi, kakava kami ri ngata Palu, ledo modekei bantua. Tapi ada nanjayoka pokarjaa, " pangaku i Ubaya.

Kotua Komisi C, Sofyan R Aswin najadi balengga posintomu nangulika, batua kakavara ri Palu, ala mompolajari berimba cara mpaolah uve nagali. Tapi rakitata mboto, naupu lingu dopa nabelo pura karjaa nu kantoro nikaika urusa hai.

"Ra pahata mbotomo le, berimba urusa nu uve nagali naupu lingu hie. Kami muni aga nositevaika berimba pura kakurangata. Vesia muni geira. Kamba ante posintomu hie, naria polajaran rakava, rapaketa riara mimpaka belo ngatata, " niuli i Sofyan.

Naupu posintomu, wakele todea Palu, nodekei panggeni pale ka Dekot Bontang manjili ri ngatara. Pisintomu nompamula dako tinti 10 sampe 11.30 wib hai, nikakavaka i Danawira Asri, Hamsir. BE bo Sofyan R Aswin. Katataluna Komisi C. Raodah ri Komisi A. Ane dako ri PDAM i Kurniawansyah.**

Share on Google Plus

0 komentar:

Post a Comment

close
 LAYANAN PEMASANGAN IKLAN