Dala ri Taman Ria Rapakabelo,Maupupa Tanggul ra Bangu

  • Whatsapp
banner 728x90

Reporter: Firmansyah Lawawi

NADEA Dala nagero niposabaka nu
lingu, bombatalu bo tana nalodo bula September naliu. Sala sangu na eva dala Cumi-cumi
ri Taman Ria, Kelurahan Lere, Kacamatan Palu Barat.

Sampe eo hie, dala hai
dopa nipaka belo pamarenta. Nikaika urusa hai, kapala Dinas PU Palu, Iskandar
Arsyad nipekutanaka ri talipo pale (hp) eo Kamisi (10/1/2019) netevaika proyek
nompaka belina nikenisi Kamanterian Porumahan Umum bo Pomukiman Rakyat (PUPR)

“Ane nanggenisi
proyek nompaka belo dala cumi-cumi, nisaka mboto Kamanterian PUPR. Ri mpae
anggaran 2019-2020,” pangulina.

Dala hai muni dopa rapaka
belo, nipisabaka motonggoraka vai maupu rakavia tanggul motaha balumba, ndatena
kira-kira papitu kilo meter ri tasi Palu.

“Ledo ranga
nikalingasi pamarenta mompaka belo dala cumi-cumi. Da motonggoraka tanggul
motaha balumba ntani ruru pade ra aspal. Ane ra karjamo ngena, uve ntasi mesua
ri dala hai. Jadi ledo ria gunana muni, aga magero vai mambela uve ntasi,”
pangaku i Iskandar.

Proyek manggavia tanggul
motahamaka balumba ri tasi Palu, da nasampe ri urusa tender. “Insya Allah,
ri tempo mamosu hie, rakaviamo tender pokarjaana. Ane dana rapake mombangu
tanggul hai, kira-kira noatu milyar deana,” niulina.

Rehabilitasi ante
rekontruksi dala logistik riara ngata nompamulamo nabutu. Tapi dopa satu
persen. Eva dala ri lorong modi bo gang.

“Ane urusa nompaka
belo dala ri lorong kodi bo gang riara ngata Palu, da motonggoraka vai dana
anggaran ri mpae 2019 hie,” niulina notutui jaritana.**

Berita terkait