Mombangu Kantoro Camat Tatanga Nooseaka Kadota Todea


Reporter: Firmansyah Lawawi

PERAPI Todea dako ri Kolurahan Tavanjuka, Nunu bo Palupi, ala libo pombangu kantoro Kocamatan Tatanga, rabangu ri antara tatalu kolurahan hai.

Anu hai nisani dako reses kotua DPRD Palu, i Ishak Cae ri Kolurahan Tawanjuka sakuya eo naliu. "Hasele reses riavi ri Kolurahan Tavanjuka, geira nompekutanaka nakuya kantoro Camat Tatanga ri Kolurahan Duyu. Nggauluna posituju todea, ante perdana. Rabangu ri libo antara tatalu kolurahan hai," pangulina.

Niuli i Ishak Cae, kantoro Kocamatan Tatanga ri Kolurahan Duyu, da nostatus nosewa bangunan. Ane mantora posijaritai totua ri tatalu ngata, nabelopa riara mombangu kantoro hai, notuntumaka nuapa niposijaritaira pura.

Todea ri Tavanjuka muni nerapi ka pamarenta, ala gade naria ri dala I Gusti Ngurah Rai rapaka roa. Apa kasaenamo hie, ri gade hai ledo nabelo poputara ekonomina.

Santanina muni, patujura ala gade binata ri ngatara hai maroa. Apa hamai ledo aga najadi libo posidaga japi bo tovau. Tapi muni naria posambalena.

Geira vai nerapika muni ala kalavata nu binangga ri ngatara, rapaka belo. Ala belekana maria movo, uve binangga domo mesua ri ngatara.

Ri libo ntanina, kolurahan Nunu, panguli i Ishak Cae. Todea nerapika pamarenta ala mompaka belo dala Sungai Sadan. Nipisabaka keke ri dala hai ledo nandala. Jadi ledo nasae niaspal, kana nagero vai.

Ri dala bivi binangga, ato ri libo kola pomei Nosarara, nadea nitimparaka labi nu banguna nagero. Geira nerapi ala kantoro natekai, ala moanggataka rumpu ri dala hai.

"Naupumo nitevaikaku urusa hai ka kantoro DLH. Ala moanggataka pura labi nu banguna nagero. Geira nojanjimo ra pakagalira pura," pangaku i Ishak Cae.

Share on Google Plus

0 komentar:

Post a Comment

close
 LAYANAN PEMASANGAN IKLAN