Pemkot Pakasadiamo Rp25 Milyar ka Jadup


Reporter: Firmansyah Lawawi

PAMARENTA Kota Palu nompaka sadia jaminan hidup (Jadup) ka todea nambela boncana alam ri Palu, deana Rp25 Milyar. Vesia niuli kapala Badan Porencanaan Pombanguna Daerah (Bappeda) i Arfan, Salasa (29/1/2019) ri tempona haja noevaluasi karjaa pemkot naupu lingu ri kantoro DPRD Palu.

"Anu hie muni najadimo kaputusan ri posintomu badan anggaran (Banggar) DPRD Palu, ante dana 25 Milyar ri mbula Februari bo Maret 2019," panguli i Arfan.

Ane sakuya mbula ri kauluna ngena. Ato randua mbula maupu tempo nu anggaran, Arfan notevaika nadeamo cara ni kavia. Sala sanguna eva nosijaritaika urusa hai ante Kamanterian Sosial RI.

Samantara hai, ane nikita dako paratura Kemensos lomoro 4 mpe 2015, modekei jadup hai, aga namala randua mbula. Eva jadup 10.000 saito, porlongkapan matuvu ri Huntara 3.000.000 por kk, ante kaparlua ntanina.

Data pongungsi ri Palu natetambai nahadi 40.734 niuli i Arfan. Ane nggauluna ato tempona transisi partama,  deana aga 38.000.

Natetambaina data pongungsi hai panguli i Arfan, da nadeapa todea ri Kolurahan Petobo, Balaroa bo Mamboro nalai.

"Notambaina vai data pongungsi hie, niposabaka da nadeapa geira hau nalai ri banua sampesuvura, ri kabupaten ntanina ante ri ngata ntanina dopa nate tulisi ri kolurahan pura," pangaku i Arfan.

Sampe eo hie muni, pamarenta da nobuka ka vamba ka geira sampe suvura namate, ante banuara nagera mosuaraka datara.

"Kami nitevaika ka todea riara ngata, ala mosuaraka sanga sampesuvura namate niposabaka boncana alam, ante banuara nagero ri kantoro kolurahan bo BAPPEDA. Ane urusa tomate, nakurana manggeni sura kamate dako RT," pangulina.**

Share on Google Plus

0 komentar:

Posting Komentar

close
 LAYANAN PEMASANGAN IKLAN