Raparaluka 14,5 Triliyun Rapake Mombangu Vai Palu


Reporter: Firmansyah Lawawi
NIPOSABAKA Nambela lingu, balumba mbaso bo tana noenju, ngara Palu nadea nakarugia. Dako ri todea namate, sampe banua bo banguna nagero. Riara mombangu vai Palu, ledo aga sakide doi rapake.

Dako ri posintomu bo posijaritai rancana mombangu ngata ante Pemkot, ri sala sangu hotel ri Palu minggu naliu, nisani dana rapake riara urusa hai deana 14,5 Trilyun.

Kabutuha hai nibila-bilamo dako sakuya sektor. Eva sektor ekonomi, infrastruktur, pomukiman, sosial ante lintas sektor.

Kapala BNPBD Palu, Presley Tampubolon riara jaritana nanguli sektor pomukiman deana anggaran 4,2 Trilyun, infrastruktur 6,7 Trilyun, sosial 1 Trilyun, ekonomi 2,3 Trilyun labi ante lintas sektoral 185,8 Milyar.

Tapi muni niuli i Presley, kabutuha hai dopa nigaa ante kowenangan pamarenta bo suro ntanina. Apa ngata Palu najadi ibu kota provinsi, nariapa nasimbayu kowenangana nasimbayu ka pamarenta ngata ante provinsi.

"Niosabaka hai, hasele rekapitulasi hie, naparlu ntoto rapaka gana rapaka sugi ante haja ri posintomu ri tempona hi," pangulina.

Ane rakita deana presentasi dana rapake, nambaso ntoto angkana. APBD Palu niuli i Presley, deana aga 1,3 Trilyun. Deana APBD hai matantumo ledo namala rapake mobangu pura-purana riara ngata.

APBD hai muni niului i Presley, dopa muni nigaa ante kabutuha balanja ngata. " Deana APBD hai kira-kira magana rapake riara rekontruksi bo rehabilitasi ? Anu hie muni naparlu rakaji moralbanga, ante raadvokasi, " petevaikana.

Ri libo muni hai, Kabud data bo informasi BAPPEDA Palu, Ibnu Munzir nangulika, hasele kajian dako BPBD nasimbayu ante kantorora.

Badan Poroncanaan Pombangunan Daerah panguli i Ibnu Munzir aga nompaka gana data ka BNPBD. Nocatat sakuya todea namate, sampe deana banua nagero nipisabaka lingu, balumba mbaso ante tana noenju ri ngata Palu.**

Share on Google Plus

0 komentar:

Post a Comment

close
 LAYANAN PEMASANGAN IKLAN