Geira ri Tenda Kana Manggava Jadup


Reporter: Firmansyah Lawawi

GEIRA natopa niuli penyintas anu nonturo mo ri Hunian Sementara (Huntara) na borhak mangga jaminan hidup (Jadup).

Samantara danaria 23 njobu penyintas ri Kota Palu nonturo ri tenda. Pade 16 njobu nonturomo ri Huntara. Tantu damadea geira dopa manggava jadup.

Kapadinas Sosial Kota Palu, Agus Munandar, eo Sine (20/5/2019) nanguli ane prosedur mantarima Jadup dako ri Kemensos, yaitu geira anu nonturomo ri Huntara.

Naupa vesia, tona danonturo ri tenda ra usahaka kana manggava Jadup muni.

"Nosinggava tesa mo tim dako ri Kemensos ante pamarenta kota, ante naria muni sura nu walikota, natekai deana pongungsi tahap tatalu maria 40.137 ito. Jadi geira ri tenda damanggava Jadup,” tesana.

Deana doi Jadup, niuli Agus Munandar, sapulu njobu saito. Ratarima rua mbula. “Biaya jadup hi sapulu njobu saito saeo, jangkana rua mbula. Ane rakali-kali jadina onoatu njobu saito selama aono mbula,” pangulina.

Maipaia rabayari, dopa natantu. Apa Pemkot Palu danoverifikasi vai dea nu ponyintas ri kelurahan.

Porsaratan rapakasadia nu ponyintas eva KK ante KTP. “Anu hai ratarima kamimo tanggala 22 Mei 2019,” niulina. Anu hi batuana supaya masasinta Jadup rabayari.

“Ane matekumpulu bo raverifikasi puramo data, tanggala 23 Mei data hai rapakatumo hau ri Dinsos Provinsi. Pade rapapola hau ri Kementeria Sosial RI,” pangulina.***

Share on Google Plus

0 komentar:

Post a Comment

close
 LAYANAN PEMASANGAN IKLAN